nimi "Kotalika" li ike (tawa mi)!
pona tawa ale!
tenpo ni la mi wile toki e nimi "Kotalika". sina kepeken e ni lon ma Kotalika, lon toki Kotalika, lon jan Kotalika. taso, mi pilin e ni: toki ma lon en kalama toki la, nimi "Kotalika" li pona lili a! mi toki e tan ni lon lipu ni.
sitelen tawa ni li toki e nasin "Kotalika" pi kalama toki, li kepeken toki Inli kin. ona li pana e sona pona.
sitelen tawa ni la, jan li toki e ni: toki "Kotalika" li ante tan toki Epanja tan toki Amelika lon ni: ona li kepeken lili e kalama /r/ tawa 'r' anu 'rr'. ona li kalama nasa! kalama li sama kalama /ɹ/, taso tenpo mute la ona li jo kin e kalama /ʂ/ anu /ʐ/ (?) tawa kama /ɹʂ/ anu /ɹʐ/ (mi sona ala a a). sina ken lukin e sitelen tawa ni tawa sona pona.
namako: o kute e kalama kepeken ni!
mi la, mi kepeken ala kalama /ɹʐ/ lon tenpo ale. mi kepeken ni tawa musi taso. taso, mi kalama /ɹ/ tawa kalama open 'r', tawa kalama 'rr'. mi toki suli la, mi kepeken /r/ lon tenpo mute. taso jan mute li kepeken ala. o kute e kalama mi kepeken /ɹ/ kepeken /r/ (tawa pana e ante)1.
namako: mi toki e ni:
erre con erre cigarro,
erre con erre barril,
rápido corren los carros cargados de azúcar al ferrocarril,
erre con erre guitarra,
erre con erre barril,
que rápido corren las ruedas del ferrocarril.
ona li toki pi kalama nasa pi toki Epanja.
ni la, mi pilin e ni: sina ante e nimi "Costa Rica" tan toki "Kotalika" tawa toki pona la, kalama /ɹ/ en kalama /ɹʐ/ o kama ala kalama /l/, o kama kalama /w/. ni la, nimi "Kotalika" li kama nimi "Kotawika".
nimi "Costa Rica" li nimi tu la, nimi Kota Wika li pona mute a! taso nimi Kotawika li pona kin.
lipu ni li utala ala tawa jan Sonja! mi sona e ni: ona li wile ala sona e ijo pi ma ale. ante kalama pi ma wan li lili mute a! mi wile pana taso e sona pi nasin toki Kota Wika. ona li musi. mi ken pana e tan mi pi kepeken nimi ni kin.
namako suli: mi pu la mi kama sona e ni: ma Costa Rica li ma Kosalika. nimi "Kosa" li pona a! ken la ona li lukin li kalama sama nimi Epanja "cosa" (ijo) la ma li ma "Cosa Rica" (ijo suwi! a a a). kin la, jan pi ma Limon (ona li kipisi pi ma Kota Wika) li kalama sama kalama "Co'ta Rica" (ni la nimi 'R' li /ɹʷ/) la nimi Kota Wika li pona tawa ona! (mi pilin e ni)
mi wile e ni: sina kama sona e ijo nasa sin! a a
> ilo Tewa
mi kalama /r/ kepeken wawa mute! pakala mi a a a↩